Item 2: Gree ebryday

Oba-time, when you-me lissen dah word consent, mind bor you-me tingbout umbuck. While dat one e serious, e long-way prom the pull story. E nor even chapter three.

Larn por gibbeh consent/gree/pass anytime, nor only lor umbuck or when you-me like or marret, e dah one of dah more nadakine lubly something you can makem por you and por dempla round lor you. E build trust, respect eneh makeh relationship come more strong, by showeh dempla how muss respect you gad por boundary bor em — eneh bor you too.

Waneh ebryday gree?

You might gree por sumting lor your meetings ebryday, eneh maybe you nor sabeh.

Might e gad party yah come, but you nor gad sumting por wear. You sabeh your friend gad top, eneh e gor-gor good lor you nuddah closs. So, you gor askeh em por borrow em — but em spik nor. You respect em decision eneh start gen.

Dat one e gree/consent! You be askeh question, em spik nor, you be respect em decision eneh, next day, you still friend lor em. Gree is spot up ebrywhere — lor friend, parmleh, school, work, eben online; eneh sometime more early-part, before we peel em lor umbuck or gumzirr way.

Almost ebrytime, gree e easy ebryday. But e sumtimes nor mentioned.

When gree is pass lor mind, e can make peepol peel disrespected, gad open peeling or nor safe. So even small sumtings — wasseh when you askeh someone if em wandeh hug, or ip dempla right por posteh pixar gad dempla lor pacebook/social media, e can buildeh good-passin ginar por gree. When you ask-pass, e show you care, eneh makeh you come more good friend, parmleh member, or partner.

How we makeh consent ebryday?

Youme gor start prom where dah gree pass-start prom: body bor you-me, eneh space bor you-me.

Gree or tussem eneh personal space

You lissen peepole yarn bout gree lor lubbing, eneh nadakine personal lubbing situation more, but e important lor ‘kassa-fling’ relationship, eneh ebryday situation too. E mean you sabeh you gor cant tusseh sumone, or tusseh sumting bor dempla, nor matter how you sabeh dempla or waneh dempla por you.

Comfort lebel bor people, when e cum por dipperent way por tusseh dempla, e cum prom dempla culture, passin, eneh private history bor dempla. Lor sum culture, e wrong por mun or orman por tusseh one-nutha, ip dempla nor pamleh or marret.

If sumone be suffer prom harmed pass, dem small sumting — wasseh when you askeh dempla pass before you gor por hug dempla, or when you wandeh straighteh closs bor demplah — e showeh dempla sign, you care. E makeh dempla sabeh you eben more, eneh makeh dempla peel safe lor you, eneh gibbeh dempla bygen choice por makeh sumting or spik nor por sumting eneh control lor body bor dempla.

Dah pastime u ask if em gree or nor, gor peel wasseh e wrong pass, eneh ip you nor sabeh or makem beepore, e gor takeh time eneh practice. E olright! The more you makem, dah more strong you gor come, eneh e gor come more easy. Yah, e gad some tings you might spik:

• “I can huggeh you ah?”
• “E oright if takeh dis por short-while ah?”
• “Tag bor you deh come-out. You wandeh I gor makem straight por you ah?”

Many peepol bypass gree/consent por disable peepol, but all nor mean por makem, sum-time e come from dah long-time-passin waneh sum peepol peel, or nor sabeh muss. Dempla mean well — wasseh when dempla offer por help or tusseh wheelchair — e can peel wasseh em crosseh-line or nor peel right. When you ask pass, e showeh respect por dempla and makeh dempla feel strong eneh able:

• “You wandeh hand gor uptap stairs or you wandeh I gor wait? Ip you wandeh hand, spik por me waneh dah prapa way por makem.”

Check pass bepore you yarn

Yarns bout gree/consent sometime stap lor the tusseh action only, but e join por yarns eneh where you talkbout feelings bor you too. Might e when you bout to spik you mind, ask por advice or yarn bout sumting hard, check pass por pind out ip nutha marn e lor right space por lissen eneh support, e showeh respect bor you por dempla feelings boundaries.

Yah e gad some ways por spik bepore you look por advice lor yarn:

• “I be gad nor-good day, eneh I need por leggo big yarn. You nup strong por lissen my yarn now?”
• “Yah, I’d love thoughts bor you lor sumting. You lor right mood for lissen ah?”

Ebryday gree online e count, too

When e come por online sumtings, gree eneh boundaries come hard por undastand eneh pollow, e cum more hard por undastand eneh e nor clear por pollow, especially when e cum normal por share photo bor date bor me lor group-chat or taggeh friend lor nor-good pixar.

Photo gree/consent e mean you be geddeh pass bepore you be share, tag or post sumting where e gad naddah marn inside photo, ebrytime when e might be sumting personal. Gree/Consent e can sainz or stap too, e mean if someone spik you por delete sumting, you muss makem eneh respect em.

Makeh boundary lor friends

Gree/Consent e bout respecting dah right bor nada marn por makeh dempla own choice bor dempla, por waneh good por dempla. E body bor dempla, space bor dempla, eneh decision bor dempla. E also mean you nor should guess waneh dempla wandem, nor matter how closetoon you por dempla. Eneh e samekine important por remember dah choices, boundaries eneh comfort bor you e matter too.

Kassa kai, you be gad mina nor-good day, eneh all you wandeh makem is por laydown lor couch, wasseh TV, eneh kaikai chips. Good friend bor you wandeh talk por you bout em breakup, but you nor gad strong por listen por em, eneh gib em support. Becoz yumpla always wandeh be deh por friends bor mepla, sometimes e hard por nor gibbeh support por dempla. Some ways por showeh dempla you boundaries eneh feelings e:

• “Yah, e oright ip we yarn apta bumbai? Head bor me nor right space yah now.”
• “I mina sorry you going though demkine thing. E nudakine serious por me por I yah por you, but yah now I mina tyat. I gor be free por you later bumbai.”

Sah, you be harm dah nada person’s choice for spik nor, eneh wandeh spik sorry por em

Spik you be mistake waneh e be mean — you be post pixar bor friend bor you, eneh em straight-way wandeh you por take-mout dah pixar, or you por huggeh someone, but dempla nor hug you bygen and dempla look no-good.

Sumtime, you gor geddem wrong. Mepla ebryone e human and sabeh makeh mistake. Waneh matter, e wanem you makem next.  Own-up por you mistakes, lissen eneh nor wile, eneh showeh you wanndeh larn go come more good por ebryone por longtime. E makeh nuddah peeopl peel safe, eneh letteh peepol know dat we be lissen waneh you be spik.

Ip someone spik you straight that you be crosseh boundary bor em, spik sorry eneh esso em for spik you straight, e mina big step porward:

• “I mina sorry, I nor be sabeh e b makeh you peel bard. Esso por letteh me know, I gor make sure e nor gor happen gen.”

Ip u sabeh you crosseh line, but dempla nor be spik sumting, e might makeh you peel nadakine for spik dempla. Yah e example por spik:

• “Yah, I be thinkbout waneh I b spik/makem early-part, eneh I think I might crosseh-boundary. I mina sorry. I look e nor ok, eneh I happy por you por spik por me waneh you peel. E gad anything I can makem por spik sorry?”

Gree/consent lor mind, that go more outside physical eneh mina personal, lubbing situations.

When youmpla gree lor ebryday sumtings, yumpla nor only stapeh harm, yumpla also makeh way por buildeh more honest, good-passin, eneh support relationships lor ebryone lor life bor we.